Реклама соҳасида янги қоидалар жорий этилади



 
  Расм манбаси : mgn.com.ua

“Реклама тўғрисида”ги қонуннинг янги таҳрири лойиҳаси ишлаб чиқилган ва парламентда муҳокама қилинмоқда

Парламент қуйи палатасида Қонунчилик муаммолари ва парламент тадқиқотлари институти ҳамда Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси ҳамкорликда “Реклама тўғрисида”ги қонуннинг янги таҳрири лойиҳаси муҳокамасига бағишланган давра суҳбати ташкил этилди.

Тадбирда реклама фаолиятини тартибга солувчи Ўзбекистон Республикасининг “Реклама тўғрисида”ги Қонуни 1998 йилда қабул қилинганлиги ҳамда унга ҳозирга қадар 14 маротаба ўзгартиш ва қўшимчалар киритилганлиги қайд этилди. Бундан ташқари, мазкур фаолиятни бевосита тартибга солувчи 6 та қонуности ҳужжатлари қабул қилинганлиги ва бугунги кунда амалда эканлиги таъкидланди.

Амалдаги қонуннинг нормалари сезиларли даражада эскирган бўлиб, замонавий реклама бозори талабларига жавоб бермайди. Хусусан, унда электрон тижоратда товар (хизмат)ларни реклама қилишга нисбатан талабларни белгиловчи қоидалар мавжуд эмас. Шунингдек товарларнинг харидини рағбатлантирувчи тадбирларни реклама қилиш тартибга солинмаган. Қонунда товарларнинг бозорда харидоргирлигини оширишнинг кенг тарқалган усулларидан бири реклама акцияси тушунчаси ва уни ўтказиш тартиби назарда тутилмаган.

Дори воситалари, озиқ-овқат маҳсулотлари, спиртли ичимликлар ва тамаки маҳсулотларининг рекламаси тўғрисидаги нормаларни янада такомиллаштириш зарурати мавжуд.

Тадбирда қайд этилганидек, ташқи рекламани жойлаштиришни тартибга солувчи нормалар ташқи рекламани жойлаштириш ҳуқуқини беришнинг амалдаги тартибига мувофиқ эмас. Реклама агентининг фаолияти қонун даражасида тартибга солинмаган.

Шу муносабат билан, Қонунчилик муаммолари ва парламент тадқиқотлари институти томонидан Қонунчилик палатаси билан ҳамкорликда “Реклама тўғрисида”ги қонуннинг янги таҳрирдаги лойиҳаси тайёрланди. Қонуннинг янги таҳрирдаги лойиҳасини ишлаб чиқиш доирасида реклама соҳасидаги муносабатларни тартибга солувчи нормаларни тизимлаштириш, умумий тусдаги ва амалда ўз кучини йўқотган нормаларни қонун матнидан чиқариш; давлат органларининг реклама соҳасидаги ваколатларини аниқ белгилаш; рекламанинг қонун ҳужжатлари талабларига мувофиқлиги бўйича таҳлил ва экспертиза ўтказиш таклиф этилди.

Қонун лойиҳасига маҳсулотларнинг харид қилинишини рағбатлантирувчи тадбирлар рекламаси ҳамда электрон тижоратда товарларни реклама қилишга нисбатан талабларни белгиловчи янги қоидалар киритилди. Бундан ташқари лойиҳа матни “реклама акцияси”, “ахлоққа зид реклама”, “реклама фаолияти субъектлари”, “реклама агенти” ва бошқа тушунчаларга берилган изоҳлар билан бойитилди.

2019-06-07 19:01:33  |  130 |   0  | 

0 изоҳлар



Изоҳ қолдириш







Кириш Регистрация
Парольни унутдингизми?
Кириш Регистрация
Кириш Регистрация
Регистрация