Иши судда кўрилган шахснинг кейинги тақдири кўп ҳолларда судья қабул қилган қарорга боғлиқ. Бирор кишининг ноҳақ айбланиши, масалан, қилмаган айби учун узоқ йилга озодликдан маҳрум этилишининг оқибатини тасаввур қилиш қийин эмас. Бундай ҳолатларга йўл қўймаслик, тизимга энг малакали кадрларни жалб қилиш долзарб вазифадир.

Ўзбекистон Республикаси Олий судида шу мавзуда видеоселектор йиғилиши ўтказилди, деб хабар беради ЎзА. Унда Судьялар олий кенгаши аъзолари, тажрибали судьялар ҳамда судьялик лавозимига биринчи марта тайинланадиганлар захирасига киритилган номзодлар ва уларнинг оила аъзолари иштирок этди.

Йиғилишда Судьялар олий кенгаши раиси У.Мингбоев судьялик оддий касб эмас, балки жамиятда адолат муҳитини яратилишини таъминловчи шахс эканини алоҳида таъкидлади. “Ҳақиқий адолат посбони бўлиш учун судья ўзидан кечиб ишлаши керак. Доим ўз устида тинимсиз ишлаши, ҳалоллик ва фидойилик билан хизмат қилиши лозим”, деди у.

Ҳозирги кунда судьяларни танлаш ва лавозимларга тайинлашнинг адолатли тизими яратилган. Бу жараёнга ноқонуний аралашувларнинг олдини олиш учун номзодлар очиқ, ошкора ва муқобил танлов асосида танланади. Зеро, бугунги кун судьяси халқимиз кутаётган адолатли қарорлар қабул қилишга ҳар томонлама қодир, мустаҳкам иродали, юксак маънавий ва касбий фазилатларга эга бўлмоғи шарт.

Айтиб ўтиш керакки, судья лавозимига муддатсиз тайинлаш амалиёти жорий қилинди. Шу асосда судьялар мустақиллигининг кафолатлари таъминланиб, уларни ҳимоя қилиш тизими яратилди.

Судьяларни илк бор лавозимга тайинлаш масаласини кўришда уларнинг яшаш ва иш жойидаги фаолияти синчиклаб ўрганилиб, кенг жамоатчиликнинг фикри ҳам инобатга олинади. Яъни ижобий тавсифга эга номзодлар судьяликка тайинланиши мумкин.

Тадбирда иштирокчилар бундай мулоқотлар нафақат бўлажак судьялар, балки уларнинг ота-оналарига ҳам алоҳида масъулият юклашини қайд этди. Номзодлар келгусида ўзларига юклатилган вазифаларни юксак даражада бажариш, билим ва тажрибасини адолат йўлида сарфлаш ниятида эканини билдирди.

2018-11-08 17:18:05  |  3549 |   0  |