Ўзбекистон Республикаси норезидентлари бу ерда бизнес юритишдан топган даромадларидан эркин фойдаланиш имкониятига эга бўлди

Тижорат банклари томонидан норезидентларнинг Ўзбекистон Республикаси миллий валютасидаги ҳисобварақларини юритиш тартиби ва Тижорат банклари томонидан чет эл валютасидаги ҳисобварақларни юритиш тартибига тузатишлар киритилди, деб хабар беради Norma.

Биринчидан, энди уюшган савдоларда жамият акцияларини сотиб олишни (сотишни) амалга оширувчи норезидент юридик шахсларга ҳам миллий ва чет эл валютасидаги ҳисобварақлар очилиши мумкин. Уларга, тегишинча, бундай савдолардан тушган маблағлар ўтказилади.

Иккинчидан, доимий муассаса ташкил этган норезидент юридик шахсларга Ўзбекистондаги инвестицион фаолияти натижасида олинган дивидендлари ва бошқа даромадларини ўзларининг миллий ва чет эл валютасидаги ҳисобварақларига ўтказишга рухсат берилди.

Доимий муассаса орқали Ўзбекистонда фаолиятни амалга оширадиган норезидентларнинг чет эл валютасидаги маблағлари мамлакат ташқарисидаги ҳисобварақларга ўтказилиши мумкин. Бошқача айтганда, фойдани репатриация қилишга рухсат берилди.

Ҳужжатлар (1, 2) Қонун ҳужжатлари маълумотлари миллий базасида эълон қилинган ва 2019 йил 25 мартдан кучга кирди.

2019-03-26 16:15:09  |  2057 |   0  |