Куни кеча ўзбекистонлик таниқли адвокат, “SIMAY KOM” адвокатлик фирмаси бошқарувчи ҳамкори Сергей Майоров БМТнинг судьялар ва адвокатлар мустақиллиги масалалари бўйича махсус маърузачиси Диего Гарсия-Саянга мурожаатнома эълон қилгани ҳақида хабар берган эдик. Унинг мурожаатида мамлакатимиз судлов тизимидаги долзарб муаммолар, адвокатлик фаолиятини амалга ошириш чоғида ҳуқуқни муҳофаза қилиш органлари томонидан содир этилаётган ноқонуний хатти-ҳаракатлар ва тўсқинликлар тўғрисида сўз боради.

“Advokat” мухбири Сергей Майоров билан боғланиб, ундан БМТ махсус маърузачисига мурожаат билан чиқиш фикри қачон пайдо бўлгани билан қизиқди, шунингдек, мурожаатда келтирилган маълумотлар юзасидан изоҳ сўради:

– Диего Гарсия-Саянга мурожаатни дабдурустдан, аниқроғи, у билан учрашувга таклиф этилганимни билганимдан сўнг тайёрладим. Унда мен ўзим шахсан иштирок этган, ҳимоямдаги ва менга ишонч билдирган инсонларга нисбатан қонунсизлик ва адолатсизлик қилинган даъво ишларидан мисоллар келтирганман, дея сўз бошлади Сергей Александрович.

– Аввалига мурожаатим омма эътиборига бир неча ойдан кейин, БМТнинг Инсон ҳуқуқлари бўйича Олий комиссари ҳукуматимизга бу ҳақда маълум қилганидан сўнггина ҳавола этилади деб ўйлагандим.

Бироқ, дўстим – ҳуқуқбон Сурат Икрамов уни шу кунларда эълон қилса, кўпроқ фойдаси тегишига ишонтирди. Мурожаатни интернет орқали ёйишга рози бўлдим. Мамлакатда ҳар жабҳада, жумладан ҳуқуқий соҳада ҳам ижобий ўзгаришлар юз бермоқда. Президент Шавкат Мирзиёев ўтказаётган ислоҳотлар тарафдори эканлигимни ҳозир баралла айта олмасам, қачон айтаман?

Шунинг учун мен ҳуқуқий соҳадаги, айниқса, адвокатлар фаолияти ва судлар ишида кузатилаётган камчиликлар ҳақида ошкора гапиришга қарор қилдим.

Мен ўз мурожаатимда баён қилганим – адвокатлар ва судьяларнинг мустақиллиги даражаси, аниқроғи тобелиги ҳақидаги фикримда собитман. Албатта, мен ўзим қатнашган даъво ишларини кўрган судьяларгагина баҳо берганман.

Бу менинг бошқа судьяларга ҳам худди шундай салбий баҳо беришимни англатмайди. Қолаверса, мен кўп бора билимдон ва малакали судьялар олиб борган ишларда иштирок этганман, уларнинг қарорлари – позицияларининг мустақиллигини шубҳа остига қўймаган.

Умид қиламанки, мен кўрсатиб ўтган ишлар бўйича БМТнинг Махсус тартиб-таомиллари бўйича Олий комиссарига мурожаат қилишга зарурат туғилмайди.

Умид қиламанки, Президент ва Бош прокуратура Олий комиссар иштирокисиз ҳам, мен қайд этиб ўтган шахсларга нисбатан адолатни тиклаш учун куч ва имконият топишади.

Чет эллик инвесторлар Ўзбекистон иқтисодиётига сармоя киритишни хоҳламаётганининг бирламчи сабаби уларнинг ўз инвестициялари суд ҳимоясида эканлигига, аниқроғи, аксарият судьяларнинг мустақиллигига ишончи комил эмаслигидадир. Судлардаги аҳвол тузатилса, бу инвесторлар учун ижобий сигнал бўлур эди.

Кўп танишларим хабаримни ўқиб, мени ҳуқуқ-тартибот органлари томонидан турли тажовуз ва иғволардан эҳтиёт бўлишим кераклиги ҳақида огоҳлантиришди. Буларнинг бари ўринсиз!

Кўпчилик мени қўллаб-қувватлади. Бироқ, улар орасида адвокатлар бўлмади. Ёки мен ўз позициямда ноҳақман, ёки уни бевақт ва номақбул шаклда изҳор қилдим.

Нима бўлган тақдирда ҳам, адвокатлар ҳамжамиятининг фикрини билишни истардим. Судьялар жамияти фикрини билишни орзу ҳам қилмайман. Қайси орган, қайси ОАВ, қайси ахборот ресурси судьялар позициясини ифода этишидан эса хабарим йўқ.

2019-09-24 19:38:21  |  3809 |   0  |