Бекобод туман прокуратураси шу йилнинг июнь ойи охирида туман туғуруқхонасида содир бўлган фожиали воқеа – фуқаро К.А ва унинг чақалоғи ўлими ҳолати юзасидан терговга қадар текширув ҳаракатларини якунлаб, ишни судга оширди.

Kun.uz маълумотига кўра, шу йилнинг 28 июнь куни Сирдарё вилояти Ширин шаҳрида доимий рўйхатда турган ва Бекобод туманида яшаб келган фуқаро К.А туман тиббиёт бирлашмаси туғруқ бўлимига ҳомиладорлиги бўйича мурожаат қилган ва шу куни туғруқ бўлимига қабул қилинган. Касаллик тарихига ҳомила 42 ҳафталик бўлгани қайд этилган.

Лекин, туман тиббиёт бирлашмаси туғруқ бўлими акушер-гинеколог шифокорлари томонидан фуқаро К.А.нинг умумий аҳволи тиббий кўрикдан бепарворлик ва қониқарсиз аҳволда ўтказилган, ҳомила 42 ҳафталик бўлганини инобатга олишмаган. Оқибатда эса фуқаро К.А ва унинг ҳомиласи нобуд бўлган.

Жорий йилнинг 2 июль куни Бекобод туман тиббиёт бирлашмаси шифокорлари ва бошқа ходимларига нисбатан жиноят иши қўзғатилганди. Уларга Жиноят кодексининг 116-моддаси 3-қисми (касб юзасидан ўз вазифаларини лозим даражада бажармаслик ва эҳтиётсизлик натижасида қилинган қилмишлар одамлар ўлимига сабаб бўлса) билан айб қўйилганди.

Ўтган вақт мобайнида жиноят иши юзасидан дастлабки тергов ҳаракатлари олиб борилган. Мазкур ҳолат юзасидан 3 июлда комиссион суд тиббий экспертизаси тайинланган. Унинг натижасига кўра, 30 сентябрь куни Бекобод туман тиббиёт бирлашмаси собиқ врач-гинекологи Ф.У.га айблов қўйилган. Унга нисбатан гаров эҳтиёт чораси қўлланилиб, жиноят иши мазмунан кўриб чиқиш учун жиноят ишлари бўйича Бекобод туман судига юборилган.

Ҳозирда мазкур жиноят иши жиноят ишлари бўйича Бекобод туман судида кўрилмоқда.

2018-11-06 17:28:38  |  2286 |   0  |