Адлия вазирлиги Ўзбекистонда бундай амалларнинг кенг тарқалаётганидан ташвишланмоқда

Ўзбекистонда сеҳр-жоду билан шуғулланганлик учун маъмурий ҳамда жиноий жавобгарлик белгиланиши мумкин. Адлия вазирлиги Маъмурий жавобгарлик тўғрисидаги кодекс ва Жиноят кодексига шу ҳақида нормалар киритишни таклиф қилмоқда.

"Ҳозирги кунда фолбин, сеҳргар, экстрасенслар ва бошқа шу каби шахслар томонидан инсон ва аҳолининг оммавий онгига салбий таъсир ўтказиш ҳолатларининг олдини олиш ва унга қарши курашишга қаратилган қонун қабул қилиниши зарурати юзага келмоқда", – дейилади Адлия вазирлигининг Kun.uz интернет нашрига берган хабарида.

Маълум қилинишича, ҳозирги вақтда Ўзбекистонда сеҳр-жодунинг кенг тарқалиши кузатилмоқда. 2019 йилнинг ўтган 3 ойи давомида сеҳр-жоду йўли билан фуқароларга 22 млн. сўмдан ортиқ моддий зарар етказилган. 20 кишига нисбатан 1 та жиноят иши, 18 та маъмурий иш қўзғатилган.

Бундан ташқари, биргина Қашқадарё вилоятининг ўзида сеҳр-жоду билан шуғулланувчи 337 киши аниқланган, уларнинг устидан 115 та шикоят келиб тушган.

Шу муносабат билан Адлия вазирлиги "Реклама тўғрисида"ги қонунга сеҳр-жоду хусусиятига эга бўлган рекламаларни тарқатишни тақиқловчи;

Маъмурий жавобгарлик тўғрисидаги кодекс ва Жиноят кодексига эса сеҳр-жоду билан шуғулланганлик учун маъмурий ҳамда жиноий жавобгарликни белгиловчи нормалар киритиш тўғрисида таклифлар тайёрламоқда.

2019-04-22 20:59:40  |  4179 |   0  |