Фуқаролик даъволари муддати ўтишининг тўхтатилиши шартларига медиацияга оид банд ҳам киритилди

Ўзбекистонда медиация тартиб-таомилларини ўтказиш тўғрисида келишув имзоланиши даъво муддатининг ўтиши тўхтатиб туриладиган ҳоллар (Фуқаролик кодекси 156-моддаси) сирасига киритилди.

Бу Ўзбекистон Республикаси Президенти 2019 йил 20 март куни имзолаган “Мамлакатда ишбилармонлик муҳитини яхшилаш бўйича қўшимча чора-тадбирлар қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунда кўзда тутилган.

Фуқаролик кодексининг 156-моддасига мувофиқ, даъво муддатининг ўтиши қуйидаги ҳолларда тўхтатилади:

1) агар даъво қўзғатилиши учун муайян шароитларда олдини олиб бўлмайдиган фавқулодда ҳодиса (енгиб бўлмас куч) тўсқинлик қилган бўлса;

2) Ўзбекистон Республикаси Ҳукумати мажбуриятларни бажаришни кечиктирганлиги (мораторий) туфайли;

3) агар даъвогар ёки жавобгар ҳарбий ҳолатга ўтказилган Қуролли Кучлар, чегара қўшинлари ва ички қўшинлар таркибида бўлса;

4) агар муомалага лаёқатсиз шахснинг қонуний вакиллари бўлмаса;

5) тегишли муносабатни тартибга солувчи қонун ҳужжатларининг амал қилиши тўхтатилган бўлса;

6) медиация тартиб-таомилини амалга ошириш тўғрисида келишув тузилган тақдирда.

2019-03-25 17:44:25  |  2828 |   0  |