— Адвокатлар палатаси раиси Тошкент шаҳрида ва вилоятларга чиқиб бизга йилига камида бир мартадан ҳисобот бериб туриши керак, — деган эди Тошкент шаҳридаги “Tiniq oydek himoya” адвокатлик фирмаси адвокати Тамара Тиллаева Ўзбекистон Республикаси Адвокатлар палатасининг III конференциясида сўзга чиқиб. — Йил давомида нималар бўлди, бизнинг молиявий маблағларимиз қандай сарфланяпти, адвокатура тизимини такомиллаштириш бўйича нималар қилиняпти – билайлик. Қачон беш йил ўтиб, яна конференцияда ҳисобот эшитамиз деб кутиб ўтирмаслигимиз керак. Бу палатага бўлган ишончни мустаҳкамлаш учун ҳам керак. Чунки, тўғрисини айтайлик, вилоятларда ҳатто Палата раҳбарияти алмашиб кетса ҳам анчагача бехабар юрадиганлар бор... Шундай экан, кейинги пайтда Палата томонидан амалга оширилаётган яхши ишларни қаердан билади улар. Натижада фақат аъзолик бадали йиғиб олишни биладиган бюрократ идора деб тушуниб норози бўлиб юраверишади...

Тамара опанинг бу чиқишига куни кеча сайтимиз орқали юборилган муносабат билан танишиш баҳонасида уларни яна бир бор ўқиб чиқдик. Назаримизда, суд-ҳуқуқ соҳасининг турли идораларида узоқ йил меҳнат қилган тажрибали ҳуқуқшунос-адвокатнинг бу фикрлари ҳамон ўз долзарблигини йўқотмабди. Шу боис “Advokat” журналида чоп этилган мазкур таклиф ва мулоҳазаларни сайтимиз ўқувчилари эътиборига яна бир бор ҳавола қилишга жазм этдик.

– “Ягона дарча” ташкилоти нега прокуратура ва ички ишларнинг барча сўровларига бепул жавоб беради, лекин бизга бундай имтиёз йўқ, — деганди ўшанда Тамара опа адлия вазирига қарата. — Битта иш бўйича бешталаб сўров беришимиз мумкин, ҳар бирига пул тўлаш адвокатга оғирлик қилади. Шу масалани ҳал қилиб беришларини сўраймиз.

Шундан сўнг адвокат яна қуйидаги қатор муаммоларни ҳам санаб ўтган:

– Адвокатларнинг малака оширишдан қочиши сабабларидан бири ҳам моддий аҳвол билан боғлиқ. Ўқиш – пуллик, уни адвокат ўз ёнидан тўлаши керак. Қолаверса, Тошкент шаҳрига келиб-кетиш, ётоқ харажатлари бор. Таклифим шуки, Палата тузилмасида махсус фонд ташкил қилинса ва малака ошириш курсини ўташ харажатлари қисман шу фонд маблағлари ҳисобидан қопланса. Адлия вазири адвокатлар учун алоҳида тиббиёт муассасаси ва арзонлаштирилган нархларда ётоқхона ёки меҳмонхона ташкил этиш юзасидан Ҳукуматга таклиф киритишини илтимос қиламан.

– Жиноят ишлари бўйича амалиётлардан маълумки, адвокат баъзан маҳкумни излаб овора бўлиб қолади. “Бугун Қаршига жўнатвордик ёки фалон жойда жазони ўтаяпти”, дейишади сўрасак. Адлия вазири ва Палата раисидан илтимосим, Ички ишлар вазирлиги билан келишиб, махсус база яратилса, токи жазони ўтаётган мижозимиз айнан қаерда, қайси муассасада эканини олдиндан билиш имконимиз бўлсин.

– Юридик университет ректорига савол: талабалар нега адвокатурада амалиёт ўташни хоҳламайди? Ҳамма суд ёки прокуратурада амалиёт қилишни истайди. Адвокатлик ишига қизиқтириш ва муҳаббат ҳосил қилишни айнан талабалик давридан бошлаш керак. Иложи борича яхши талабаларни айнан адвокатлик фирмаларига кўпроқ юборинг, уларнинг қандай амалиёт ўтаётганини назорат қилинг.

– Соҳадаги ҳар бир кемтикни вақтида тўлдириб, адвокатура институтини такомиллаштириш ва мустаҳкамлаш зарур. Адвокат ва прокурорнинг процессуал тенглиги бўлмас экан, адолатни таъминлаб бўлмайди.

Т.Тиллаеванинг бу фикларидан завқланган адвокат Р.Раджабов сайтимизда қуйидагича шарҳ қолдирган:

“Ҳакиқатдан ҳам адвокатура институтини такомиллаштириш ва унинг нуфузини ошириш юзасидан жуда тўғри таклиф ҳамда мулоҳазалар келтирилган.

Қўшимча таклиф қилиб айтганда, адвокатура институнини янада ривожлантириш учун адвокатларни ишхона ва техника базаси (компьютер ва офис мебель ҳ.к.) билан таъминлаш зарур деб ўйлайман. Сабаби, деярли барча адвокатларнинг ишхоналари ижара ҳисобидан. Бу, албатта, адвокатлар учун оғирлик қилади...”

2019-03-06 14:54:30  |  3037 |   0  |