Уч нафар аёлни фоҳишалик билан шуғулланиш учун Қозоғистонга олиб ўтмоқчи бўлганида чегарада қўлга тушган Алия Жуманиёзовага 4,5 йилга озодликни чеклаш жазоси тайинланди

2019 йил 14 январь куни Жиноят ишлари бўйича Мирзачўл туман суди томонидан уч нафар қизни Қозоғистон Республикасига сотиб юбормоқчи бўлган аёлга нисбатан ҳукм ўқилди. Бу ҳақда Жиноят ишлари бўйича Мирзачўл туман суди матбуот хизмати “Дарё” нашрига маълум қилди.

Мазкур жиноят иши юзасидан судланувчи Алия Жуманиёзовага нисбатан суриштирув ва тергов органи томонидан Ўзбекистон Республикаси Жиноят Кодексининг 135-моддаси (“Одам савдоси”) 2-қисмининг «б» банди ва 276-моддасининг 1-қисми билан жиноят иши қўзғатилган.

Судланувчи А.Жуманиёзова 2018 йил 31 август куни ўтказилган «Комплекс» махсус профилактик тадбири давомида қўлга олинган. Аниқланишича, у Мирзачўл туманида яшовчи фуқаролар 1994 йилда туғилган Гулруҳ Норқобилова, Жиззах шаҳрида яшовчи 1993 йилда туғилган Моҳира Абдукаримова ва 1992 йилда туғилган Умсуной Эргашеваларни ҳар бирига кунига 70-80 минг қозоқ тенгеси миқдорида иш ҳақларини ваъда қилиб, уларга Қозоғистон Республикаси Олмаота шаҳрида фоҳишалик қилишни таклиф қилиб, жуда кўп миқдорда пул ишлаб топишларига ишонтириб, Тошкент вилояти, Тошкент туманида жойлашган «Ғишт кўприк» чегара блок пости орқали Қозоғистон Республикасига ўтказиб юбормоқчи бўлган.

Шундай қилиб суд А.Жуманиёзованинг қилмишини атрофлича ўрганиб, Ўзбекистон Республикаси Жиноят Кодексининг 135-моддаси 2-қисмининг «б» бандида назарда тутилган жиноятни содир этганликда айбдор деб топиб, унга нисбатан 4 йилу 6 ой муддатга озодликни чеклаш жазоси тайинлади.

Шунингдек, судланувчи А.Жуманиёзовага оммавий тадбирлар ўтказишда иштирок этмаслик, маҳкумларни назорат қилувчи органнинг розилигисиз яшаш жойини ўзгартирмаслик, Андижон вилояти Андижон шаҳар ҳудудидан ташқарига чиқмаслик, алоқа воситаларидан фойдаланмаслик, алкоголли ичимликлар истеъмол қилмаслик каби тақиқлар қўйилган.

Судланувчи ўзига нисбатан ўрнатилган тақиқларни бузган тақдирда Ўзбекистон Республикаси ЖПК 481-моддасига асосан қўлланилган жазо бошқа оғирроқ турдаги жазога алмаштирилиши тўғрисида огоҳлантирилган.

2019-01-24 20:37:14  |  1760 |   0  |