Судьялар олий кенгаши раиси – қуйи судлар судьялари фаолиятидаги энг кўп учрайдиган ноқонуний қарорлар ҳақида

Судьялар олий кенгаши раиси Убайдулла Мингбоев биринчи инстанция, апелляция ва кассация босқичида судьялар томонидан йўл қўйилаётган асосий хато қарорлар ва ноқонуний процессал хатти-ҳаракатларни санаб ўтди.

Унинг фикрича, жорий йилнинг ўтган 6 ойи таҳлилига кўра қуйидаги ҳолатлар аҳолида суд тизими ва судьяларга нисбатан ишончни йўқотиб, юқори турувчи органларга ариза ва шикоятларнинг ортишига сабаб бўлмоқда:

Жиноят ишлари бўйича:

аниқланган ҳақиқий ҳолатга қонуний баҳо бермаслик;

Жиноят кодексининг 57-моддасини нотўғри қўллаб, енгил жазо тайинлаш;

Жиноят кодексининг 72-моддасини нотўғри қўллаб, шартли жазо тайинлаш;

қўшимча жазо тайинлаш лозим бўлган ҳолатларда уни тайинламаслик;

етказилган зарар миқдорини асоссиз камайтириш;

тақиқда бўлган мол-мулкни асоссиз равишда рўйхатдан чиқариш;

суд қарорларини ўз вақтида ижрога қаратмаслик.

Фуқаролик ишлари бўйича:

давлат божи ундиришни асоссиз кечиктириш ёки уни тўлашдан озод қилиш;

тарафларга никоҳдан ажралиш ҳақида ярашиш учун муҳлат бермаслик ёки муддатини асоссиз равишда қисқартириш;

қонуний кучга кирган ҳал қилув қарорини асоссиз равишда янги очилган ҳолатлар бўйича, деб бекор қилиш;

суд қарорларини ўз муддатида ижрога қаратмаслик;

суд қарорларига нисбатан берилган шикоятларни ҳаракатсиз қолдириш.

Иқтисодий ишлар бўйича неустойка суммасини асоссиз равишда камайтириш, етказилган зарарнинг ҳақиқий миқдорини аниқламаслик ҳолатлари кўп қайд этилмоқда.

Маъмурий ишлар бўйича ҳам шунга ўхшаш хатоликлар ва ноқонуний процессуал хатти-ҳаракатлар кузатилмоқда.

“Натижада фуқаролар айрим судьяларнинг хатти-ҳаракати юзасидан юқори судга ва бошқа идораларга тинимсиз ариза ва шикоятлар юбораяпти. Таъкидлаш керак, фуқаролар юқори судларнинг жавобларидан ҳам норозиликларини билдириб, чора кўриш учун Судьялар олий кенгашига мурожаат этмоқда”, деб ёзади У.Мингбоев.

2019-08-16 20:40:09  |  3216 |   0  |